Nork osatzen du ebete?
Iñaki Eizmendi Arsuagak sortu du ebete. Formazio eta informazio saioak prestatzeko eta garatzeko, hainbat kideren laguntza du eta zenbait aditurekin elkarlanean aritzen da.
Iñaki Eizmendi Arsuaga gizarte hezitzailea da. Urteetan Lasarte-Oriako Ttakun Kultur Elkarteko teknikaria izan da. Lan horretan, erabilera sustatzea helburu zuten hainbat proiektu landu eta koordinatu ditu. Proiektu horietako batzuk berritzaileak izan dira eta Euskal Herri osoan izan dute oiartzuna:
- Nafarroako Gobernuko Hezkuntza sailaren eskariz eta Urtxintxa Hezitzaile Eskolarekin elkarlanean garatutako Lagunarteko Hizkerarekin Jolasean egitasmoa.
- Ttakunek berak garatutako eta Euskal Herri osoko ikastetxeetan eskaintzen den Maita nazazu gutxiago eta goza nazazu gehiago: Motibazio Saioak programa.
- Gipuzkoako Foru Aldundiko Euskarako eta Gazteriako Sailekin elkarlanean garatutako Hezitzaileek asko egin dezakete eskola orduz kanpoko jardueretan euskararen erabilera sustatzeko metodologia
- Lasarte-Oriako Udaleko Euskara Batzordearekin garatutako Kalea Maixu! egitasmoa.
Iñaki Eizmendi aritu den programa ia guztien helburu nagusia eskola orduz kanpoko jardueren bidez haurren eta gazteen artean euskararen erabilera sustatzea izan da. Urteetan lan hori egiteko baliabideak eta tresnak garatzen aritu da. Orain, ebeteren bidez, baliabide eta tresna horiek beste eragile batzuentzat egokitu ditu: gurasoentzat eta irakasleentzat, bereziki.
Baliabide eta tresna gehiago garatzen ere jarraitzen du, eskaintza osatzera eta hobetzera begira. Besteak beste, bi bide hauek ari da garatzen:
- Baiezkoaren eta ezezkoaren dinamikak: Euskararen erabilera sustatzeko erabiltzen diren estrategiak aztertzea, egokitasuna eta eraginkortasuna baloratuz.
- Adimen emozionala eta euskara: Haurrek eta gazteek hizkuntzekin dituzten harremanak abiapuntu hartuz, hizkuntza guztiekin baina bereziki euskararekin harreman horiek positiboak eta indartsuak izan daitezen estrategiak eta tresnak garatzea.
Julio Ibarra kazetaria da. Urteetan ETBko albistegietako aurkezlea izan da. Gurasoa da. Euskaldun berria. Gurasoentzako hitzaldietan parte hartzen du. Bere bizipenak eta ideiak kontatzen ditu, saioak aberatsagoak, dinamikoagoak eta gertukoagoak izatea lortzen du.
